करिब ७५ हजार कित्ता सेयर डिम्याट हुन बाँकी

नेपाल धितोपत्र बोर्डले अभौतिक (डिम्याट) सेयर कारोबार सुरु गरेको एक वर्ष बित्तिसक्दा पनि करिब ७५ हजार सेयर अझै डिम्याट भएको छैन । नेपाल स्टक एक्सचेञ्ज (नेप्से) मा सूचीकृत २ अर्ब ५८ करोड ५८ लाख ६९ हजार सेयरमध्ये १ अर्ब ८३ करोड ९६ लाख १४ हजार सेयर डिम्याट भएको छ । यो संख्या सूचीकृति सेयरको करिब ७१ प्रतिशत हो ।

०६४ सालदेखि सेमी अटोमेसनमा कारोबार हुँदै आएको धितोपत्र बजारलाई फूल अटोमेसनमा लैजान ०७२ साल माघ १ गतेदेखि अभौतिक सेयर कारोबार सुरु भएको हो । सेयर बजारलाई अन्तर्राष्ट्रिय स्तरको बनाइ सुरक्षित र सहज बनाउन बोर्डले अभौतिक कारोबारको सुरुवात गरेको हो ।

अभौतिक कारोबार सुरु भएसँगै सेयरधनीसँग भएको सेयर प्रमाणपत्र प्रयोगविहीन भएका छन् । बजारमा प्रमाणपत्रमार्फत कारोबार हुँदैन । तर, सेयर कारोबार गर्न नचाहने लगानीकर्ताले सेयर अभौतिक नगराएको हुनसक्ने नेप्सेले जनाएको छ।

वास्तविक लगानीकर्ताको पहिचान गर्नका लागि र सेयर कारोबारलाई पारदर्शी बनाउन बोर्डले डिम्याट खाता अनिवार्य गरेको हो । त्यस्तै, गत माघ १ गतेदेखि उपत्यका बाहिरका लगानीकर्ताका लागि पनि डिम्याट खाता अनिवार्य गरिएको थियो। सीडीएससीका अनुसार हालसम्म ७ लाख ८८ हजार ३ सय ३८ डिम्याट खाता खोलिएको छ ।