नेप्सेमा सामान्य सुधार

यो साता नेपाल स्टक एक्सचेन्ज (नेप्स) परिसूचक बढेसँगै कारोबार रकम पनि बढेको छ । यो साता परिसूचक पहिलो दिनको तुलनामा २.३४ अंकले बढेर अन्तिम दिन १६२९.५८ अंकमा पुगेको छ ।

सातामा १५५ कम्पनीहरुको कारोबार हुँदा दुई अर्ब ६९ करोड १९ लाख ४८ हजार रुपैयाँ बराबरका ४५ लाख ६७ हजार ९० कित्ता सेयरहरु खरिद बिक्री भएका छन् ।

कारोबार रकम गत साताको भन्दा ४.२७ प्रतिशत बढि हो । गत साता १५५ कम्पनीहरुको दुई अर्ब ५८ करोड १७ लाख ८७ हजार रुपैयाँ बराबरका ८३ लाख २६ हजार दुई सय २०  कित्ता सेयरहरु खरिद बिक्री भएका थिए ।

‘क’ वर्गका कम्पनीहरुको कारोबार मापन गर्ने सेन्सेटिभ परिसूचक पहिलो दिनको तुलनामा ०.१३ अंकले बढेर ३४५.९९ अंकमा आईपुगेको छ । यो साता कारोबार रकम (१३ करोड ७६ लाख ८० हजार रुपैयाँ) को आधारमा हिमालय जनरल इन्स्योरेन्स कम्पनी लिमिटेड अग्रस्थानमा रहेको छ ।

कारोबार भएको सेयर संख्या (चार लाख ४४ हजार कित्ता) को आधारमा ललितपुर फाइनान्स कम्पनी लिमिटेड संस्थापक अग्रस्थानमा रहेको छ । कारोबार संख्या  (१८८९ वटा) को आधारमा मेरो माइक्रोफाइनान्स वित्तीय संस्था लिमिटेड अग्रस्थानमा रहेको छ ।